O xornalismo -e a televisión- cambiou moito nos últimos anos. Cambiaron a tecnoloxía, a estrutura empresarial, a filosofía de grupo, os valores humanos. O audiovisual busca agora xornalistas "polivalentes", un rédito económico que prima a estética sobre a ética, o espectáculo sobre o rigor, os contidos brandos sobre a calidade. Que influencia exerce a televisión sobre a opinión do espectador? A televisión comercial engorda? Que parte de responsabilidade teñen os empresarios, os traballadores audiovisuais e os propios cidadáns no consumo televisivo?

A sociedade actual, valéndose das ferramentas dixitais, quere ser suxeito activo na construción da realidade. Os medios de comunicación deben ser ante iso responsables e contribuír ao enriquecemento social, ao fortalecemento da capacidade crítica. Pola contra, a saúde democrática do seu tecido resentirase e o xornalismo verase abocado ao servilismo mercantil e político.

Este libro tratará de mostrar a evolución conceptual da televisión de onte a hoxe, a través da pluralidade de voces, o xuízo crítico e os principios deontolóxicos. Tentará analizar o seu funcionamento interno e dilucidar as pautas que permitan alumar o día que recuperemos o mando.

Dedica o seu libro a todos eses profesionais que informan con rigor, sexa cal for a súa especialidade e a súa ferramenta de traballo. A todos os que seguen tentando facer hoxe xornalismo de verdade.

VÍCTOR LÓPEZ (A Coruña, 1979) é licenciado en Comunicación Audiovisual pola Universidade Europea de Madrid e Máster en Dirección da Empresa Audiovisual pola Universidade Carlos III de Madrid.

Actualmente traballa como reporteiro nos Servizos Informativos de Antena 3 TV (Grupo Atresmedia), cadea coa que percorreu a práctica totalidade do territorio nacional e informou desde distintas partes do mundo.

As súas reportaxes en EEUU, Perú, Inglaterra, Noruega, Grecia, San Mariño ou a república de Benín achegáronlle ao xornalismo de investigación, á información en directo e á elaboración de programas especiais. Congreso, Audiencia, ministerios e sedes políticas, así como coberturas históricas destacadas, foron forxando o seu currículo e a súa particular forma de entender o labor xornalístico no medio audiovisual.

Ademais, escribiu guións de curtametraxes, realizou campañas publicitarias e é titulado en música polo Conservatorio de Santiago.